Marvin Rosier; gebore op 4 oktober 1995 in ‘t hospitaol vaan Mestreech.
Heer is de zoon vaan Conny en Michel Rosier.

In fibberwarie 2006 doog Marvin es 10-jaorege gamin mèt aon de ‘Laot zien watse mer kins-show’ in ‘t Heugemerveld, geprizzenteerd door Sjef Zwackhalen.
Mèt ‘t leedsje ‘Het land van mijn dromen’ vaan Jantje Smit won heer neet, meh dao begós wel ‘ne sjieken tied veur häöm! Heer woort door Frans Theunisz en Joie de Vivre mètgenome veur optrejjes en kwaom zelfs tot de kwaartfinaal vaan ‘De weg naar Tialf’ georganiseerd door Sterren.nl.
Op 1 aprèl 2007 gaof heer zien ierste succesvol CD-prizzentatie in Café de Victorie.
De middelbare sjaoltied braok vervolgens aon en ‘t zinge woort op e lieger pitje gezat.

In 2013 besloot Marvin d’n draod weer op te pakke en kroop heer de studio in bij Marcel van Golde.
De ierste drei Nederlandse nómmers waore opgenome en neet väöl later stoonte ouch de ierste drei Mestreechse nómmers op band.
Naotot heer dees nómmers had oetgebrach, besloot Marvin zien twiede CD-prizzentatie te organisere.
Op ziene verjaordaag, 4 oktober 2014, vierde heer in de Harbour Beachclub vaan WSV Randwyck ziene come-back, geprizzenteerd door Sjef Zwackhalen, bij wee ‘t allemaol waor begós.

In de jaore daonao, waor Marvin erg zeukende nao ‘n eige identiteit.
Mèt ‘t eige gesjreve nómmer ‘Iech wèl diech’ kwaom heer in de zjuste riechting.
In 2016 brach heer zien ierste eige nómmer oet ‘Lach ins tege miech’, boenao ‘t twiede eige nómmer ‘De höbs ‘ne wejjer’ al gaw volgde.

In 2017 góng Marvin e nui avontuur aon. Zuuderleefde, de ierste boyband vaan Limburg woort gebore.
Mèt ‘t nómmer ‘Dich bis de bom’ störmde zie de Limburgse hitlieste in, mèt es keers op de toert de nómmer 1 notering in de Limbo Top 10 vaan L1! Binne ‘n haaf jaor mochte zie al op twie groete podia in Limburg stoon.
In Kerkraoj bij ‘t WMC en in Heerlen bij ‘Aod òp nuj’ boe zie mèt ‘t Limburgs volksleed de Limburgse Vastelaovend opende.

Boe heer dach tot 2017 neet mie sjieker kós, kwaom dao 29 oktober nog um d’n hook loere.
Veur d’n ierste kier stoont Marvin, same mèt Jelke Schijlen en Nick van Oerle, in de finale vaan ‘t Mestreechs Vastelaovendsleedsjes Konkoer.
Leedsje nómmer 7, ‘Gewoen e vastelaovendsleedsje’ gesjreve door Patrick vaan de Weijer, woort oetgerope es ‘t liefleed veur zienen hoegen Hoeglöstegheid vaan 2018!

Marvin Rosier is ‘ne good gemötste, echte Mestreechse jong, dee vaan e fieske hèlt en dat ‘t leefste zingend mèt uuch viert! Geer zalt häöm zeker hei of dao in Mestreech, meh ouch zier zeker in Limburg, tege goon koume.

Kompleminte, Marvin Rosier






 
 
   

 

 

© 2013 www.marvinrosier.nl